Alexander aftur í landsliðið | Sex HM-farar ekki með

Aron Kristjánsson landsliðsþjálfari hefur valið landsliðshópinn fyrir leikina tvo gegn Slóveníu í undankeppni EM 2014. Hann hefur gert talsverðar breytingar á liðinu.

Ísland mætir Slóvenum tvívegis á næstu dögum. Fyrst ytra þann 4. apríl næstkomandi og svo sunnudaginn 7. apríl í Laugardalshöllinni.

Alexander Petersson, sem gaf ekki kost á sér í íslenska liðið fyrir HM á Spáni í janúar, er kominn aftur í liðið sem og þeir Rúnar Kárason og Ingimundur Ingimundarson. Allir voru meiddir á meðan HM stóð yfir.

Talsverð vandræði eru á línumönnum íslenska landsliðsins. Vignir Svavarsson sleit nýverið krossband í hné og þá fór Kári Kristján Kristjánsson nýverið í aðgerð. Vignir er ekki með nú en Kári var hins vegar valinn.

Þá berast nú fregnir af því að Róbert Gunnarsson verði ekki með í fyrri leiknum gegn Slóveníu vegna sprautumeðferðar, eftir því sem kemur fram í tilkynningu HSÍ. Þó eru vonir bundnar við að hann verði með í seinni leiknum.

Þeir Atli Ævar Ingólfsson og Jón Þorbjörn Jóhannsson hafa verið kallaðir í landsliðið vegna línumannavandræðanna.

Þá vekur talsverða athygli að Arnór Gunnarsson, sem þótti standa sig vel á Spáni í janúar, er ekki valinn í liðið nú. Aðrir HM-farar sem detta út eru Ólafur Guðmundsson, Ernir Hrafn Arnarson, Hreiðar Levý Guðmundsson og Fannar Friðgeirsson auk Vignis.

Aron landsliðsþjálfari fór með þrjá markverði á HM á Spáni en skilur nú Hreiðar Levý eftir fyrir utan hóp.

Fjórir leikmenn íslenska liða voru einnig valdir í æfingahóp fyrir seinni leikinn gegn Slóvenum.

Íslenska landsliðið:

Markmenn:

Aron Rafn Eðvarðsson, Haukar

Björgvin Páll Gústavsson, Magdeburg

Vinstri hornamenn:

Guðjón Valur Sigurðsson, THW Kiel

Stefán Rafn Sigurmannsson, Rhein-Neckar Löwen

Vinstri skyttur:

Aron Pálmarsson, THW Kiel

Ólafur Gústafsson, Flensburg

Leikstjórnendur:

Snorri Steinn Guðjónsson, GOG

Ólafur Bjarki Ragnarsson, Emsdetten

Hægri skyttur:

Alexander Petersson, Rhein-Neckar Löwen

Ásgeir Örn Hallgrímsson, Paris Handball

Rúnar Kárason, TV Grosswallstadt

Hægra horn:

Þórir Ólafsson, KS Vive Targi Kielce

Línumenn:

Atli Ævar Ingólfsson, Sönderjyske

Jón Þorbjörn Jóhannsson, Haukar

Kári Kristján Kristjánsson, HSG Wetzlar

Róbert Gunnarsson, Paris Handball

Varnarmenn:

Sverre Andreas Jakobsson, TV Grosswallstadt

Ingimundur Ingimundarson, ÍR

Til æfinga á Íslandi:

Daníel Freyr Andrésson, FH

Bjarki Már Elísson, HK

Róbert Aron Hostert, Fram

Ragnar Jóhannsson, FH